«Muzeý gymmatlyklary – medeni miras» atly tegelek stoluň başyndaky söhbetdeşlik

Hormatly Prezidentimiziň başda durmagynda ata Watanymyz Berkarar döwletiň täze eýýamynyň Galkynyşy döwründe eziz halkymyzyň müňýyllyklardan gözbaş alyp gaýdýan taryhy-medeni mirasyny aýawly saklamak, olary ylmy esasda öwrenmek we dünýä ülňülerine laýyk derejede abatlamak işlerine aýratyn uly ähmiýet berlip, milli gymmatlyklarymyz döwrebap görnüşde yzygiderli dikeldilýär hem-de baýlaşdyrylýar. 2025-nji ýylyň 14-nji aprelinde Arkadag şäheriniň Taryhy we ülkäni öwreniş muzeýinde «Muzeý gymmatlyklary – medeni miras» atly tegelek stoluň başyndaky söhbetdeşlik geçirildi. Söhbetdeşlige Türkmenistanyň Milli bilim institutynyň Jemgyýetçilik bilimler bölüminiň müdiri Ogulbaýram Meläýewa, Şekillendiriş sungaty muzeýiniň baş gazna saklaýjysy Mähri Atdaýewa, Arkadag şäheriniň Taryhy we ülkäni öwreniş muzeýiniň direktorynyň orunbasary Käkilik Öwezberdiýewa gatnaşdylar. Gepleşigi «Arkadag teleýaýlymynyň medeniýet bölüminiň jogapkär kätibi Gülşät Hudaýgulyýewa alyp bardy. Söhbetdeşligiň dowamynda Şükür bagşy adyndaky Arkadag şäher çagalar sungat mekdebiniň mugallymlary çykyş etdiler. Ata-babalarymyz tarapyndan sünnälenip ýerine ýetirilen taryhy we medeni gymmatlyklarymyz ylmy taýdan öwrenilýär. Türkmen halky asyrlarboýy öz gadymy taryhyny, medeni we milli gymmatlyklaryny, urp-adatlaryny aýap saklap, olaryň durmuşdaky tutýan ornuny, ähmiýetini kesgitläp gelipdirler. Ýurdumyzyň dünýä derejesinde gurlan ajaýyp muzeýlerinde jemlenip ýygnalan, aýawly saklanýan, ylmy taýdan öwrenilýän hem-de halka ýetirilýän muzeý gymmatlyklary munuň janly şaýadydyr. Dünýä jemgyýetçiligine mälim bolşy ýaly, Türkmen topragy adamzat medeniýetiniň ilkinji ojaklarynyň biri hasaplanýan siwilizasiýalaryň gadymy mesgeni bolupdyr. Müňýyllyklaryň içinden baý tejribe toplap gelen halkymyzyň dünýä nusgalyk mirasy, milli gymmatlyklary, edim-gylymy we ajaýyp däp-dessury bar. Bu gymmatlyklar ösdürilip, kämilleşdirilip biziň günlerimize ýetirilipdir. Gahryman Arkadagymyzyň, Arkadagly Gahryman Serdarymyzyň halkymyzyň taryhy tejribesi esasynda kemala gelen mirasynyň gadymy we gaýtalanmajak nusgalaryny halk arasyndan toplamak, olary ylmy esasda öwrenmek hem-de olaryň gymmatyny halka ýetirmek, dünýä ýaýmak baradaky taýsyz tagallalary gadymy mirasly halkymyzyň milli gymmatlyklaryny öwrenmekde biziň öňümizde täze ýollary açýar.

«Muzeý gymmatlyklary – medeni miras» atly tegelek stoluň başyndaky söhbetdeşlik