«Milli medeni mirasymyza belent sarpa» atly döredijilik duşuşygy

Arkadag şäheriniň Taryhy we ülkäni öwreniş muzeýinde «Milli medeni mirasymyza belent sarpa» atly döredijilik duşuşygy gecirildi we Arkadag telaýaýlymy ýazgy etdi. Duşuşykda Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň orunbasary Beýzali Ataýew, Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň bölüm müdiri Umida Kakaýewa, Türkmenistanyň Beýik Saparmyrat Türkmenbaşy adyndaky Şekillendiriş sungaty muzeýiniň baş gazna saklaýjysy Mähri Atdaýewa, Türkmenistanyň Beýik Saparmyrat Türkmenbaşy adyndaky Şekillendiriş sungaty muzeýiniň bölüm müdiri Söýün Sähetgylyjow çykyş edip ata-babalarymyzyň döreden baý medeniýeti, däp-dessurlary, sungaty, milli-medeni gymmatlyklarymyzy ýaş nesillere ýetirmekde muzeýiň ähmiýeti dogrusynda gürrüň berdiler. Muzeýler diňe bir taryhy we medeni medeni gymmatlyklary saklaýan ýer hökmünde däl-de eýsem, jemgyýetiň bilim, döredijilik we özara düşünişmek mümkinçiliklerini giňeldýän häzirki zaman ylmy ojaklaryna öwrüldi. Häzirki zaman muzeýleriniň ösüşi häzirki jemgyýetiň medeni, ylmy, tehnologiýa we sosial ösüşleri bilen aýrylmaz baglanşyklydyr. Häzirki zaman muzeý sergileri diňe bir geçmişe garamak bolman, häzirki döwrüň pikirlenşini, tehnologiýasyny, döredijiligini we jemgyýetçilik gatnaşyklaryny öz içine alýar. Türkmen halkynyň medeni mirasy – müňýyllyklaryň dowamynda kemala gelip, halkymyzyň ruhy dünýäsini, taryhyny, döredijiligini we ýaşaýyş ýörelgelerini özünde jemleýän gymmatlykdyr. Bu miras diňe bir geçmişiň nyşany bolman, eýsem häzirki döwürde hem halkymyzyň ruhy baýlygyny berkitmekde we milli özboluşlylygyny saklamakda möhüm ähmiýete eýedir. Türkmen zenanlarynyň el hünärleri dünýäde meşhurlyga eýe boldy. Olaryň döreden halylary, keşdeleri sungat derejesine ýetdi. Türkmen milli lybaslary – halkyň ýaşaýyş-durmuşyna, howa şertlerine we ruhy garaýyşlaryna laýyklykda emele geldi. Türkmen halkynyň medeni mirasy – halkymyzyň ruhy baýlygynyň çeşmesi, döwletimiziň ösüşiniň ruhy binýady bolup hyzmat edýär. Bu mirasy öwrenmek, goramak we ösdürmek her birimiziň mukaddes borjumyz bolup durýar. Döredijilik duşuşygyna Arkadag şäheriniň Taryhy we ülkäni öwreniş muzeýiniň, Türkmenistanyň Beýik Saparmyrat Türkmenbaşy adyndaky Şekillendiriş sungaty muzeýiniň hünärmenleri, Türkmenistanyň Magtymguly adyndaky Ýaşlar guramasynyň Arkadag şäheriniň Geňeşiniň işjeň agzalary, Arkadag şäherindäki orta mekdepleriň mugallymlary gatnaşdylar.

«Milli medeni mirasymyza belent sarpa» atly döredijilik duşuşygy